參加《聲夢》出道嘅 潘靜文 最近推出新歌《遺憾還是會完》，早前Sherman更現身粉絲喺茶飲店舉辦嘅宣傳應援活動，忙裡偷閒同大家見面。不過粉絲俾Sherman嘅驚喜陸續有嚟，佢哋喺鐵路站租用大型廣告燈箱，Sherman都特登去打卡，仲喺限時動態提醒粉絲要把握時間去影相。
除咗歌手身份，Sherman呢段時間都忙於拍攝處境劇《愛．回家之三代同糖》，佢所飾演嘅社恐秘書「莫希靈」一登場已經憑神似動畫電影人物「阿愁」嘅造型備受觀眾關注，加上佢將細膽社恐演繹得淋漓盡致，所以都令角色好受觀眾歡迎。
但Sherman喺社交平台分享拍攝花絮，仲留低一句：「希靈好似又準備辭職」令人想入非非，但喺9月15號播出嘅第27集《最佳秘書》中揭曉答案！劇情發展到吳若希飾演嘅唐萬里想借莫希靈之手「借刀殺人」，清除由趙浚承飾演嘅楊帆，再炒埋莫希靈，不過結果出乎意料，希靈唔只有得留低，仲得到唐萬里欣賞呀！
《愛．回家之三代同糖》星期一至五晚 20:00 翡翠台