一眾盈光粉（陳芷盈粉絲）聯同中聲唱將及評審，日前齊齊為16號正日生日嘅 陳芷盈 慶祝，一向以歌聲傳遞祝福嘅芷盈，生日會上除咗獻唱福音歌，佢仲遞請咗 劉洋 上台同佢合唱。
呢日可以話係三喜臨門，因為除咗為芷盈慶祝生日外，仲係佢新專輯發布同宣布開演唱會嘅好日子，講到生日願望，芷盈就話一直好希望自己嘅歌可以祝福到別人，所以佢希望有機會可以邀請到一啲基層家庭嚟睇佢嘅演唱會。
肥媽 一直疼錫一眾中聲歌手，不時會現身支持佢哋嘅活動，即使佢近排受鼻竇炎困擾，但都照樣現身支持。肥媽指《中年好聲音》呢個節目，除咗為大家實現人生第二個夢想外，喺追夢後仲有延續嘅工作，佢都戥一眾參賽者開心。
首次聽芷盈唱現場嘅 李佳 ，就話相當驚喜，亦令佢對芷盈嘅演唱會相當期待。 黃劍文 就讚芷盈嘅聲音相當甜美，所以知道對方將出專輯同開騷，都戥對方開心。而 何晉樂 就指知芷盈努力咗好耐，希望對方演唱會可以大賣同演出成功呀。
