新劇改變自法國小說《危險關係》，荷里活曾經翻拍成電影，03年韓國亦有 裴勇俊 同 全度妍 翻拍嘅電影版本，今次係第一次改編成劇集。而孫藝珍、池昌旭同NANA將會上演一段禁忌三角戀。
孫藝珍話因為電影關係，畫面仍然留喺佢腦海之中，而呢次以電視劇方式呈現故事，每個角色嘅故事都會更詳細展現﹐對演員而言可能係一個更有野心嘅媒介。而隨故事脈絡逐漸累積，角色亦變得唔再單一，而且男女主角間心理戰、以及對女二號嘅睇法亦變得好微妙。
池昌旭過往都演出過大尺度劇集，今次同兩位唔同類型嘅靚女合作，大家都好期待佢哋三位究竟會擦出咩火花。佢就話，原著小說入面表達嘅人與人之間感情同關懷都非常有趣，而家會透過電視劇方式製作覺得好有趣，亦好期待同導演以及兩位女演員合作，而且同兩位風格唔一樣嘅女演員一齊演戲，都係一個有趣嘅經驗，所以先會接呢套劇。
池昌旭除咗忙新劇宣傳，亦飛到台灣出席代言活動。活動當日人潮逼爆現場，連天橋都企滿人，場面墟冚，而池昌旭亦冇令大家失望，握手、比心心有求必應，令粉絲覺得好滿足。