林智樂邀甄敏芳演MV女友 報備親密度屬兒童節目尺度

Felix林智樂為新歌《魔法情侶工作室》拍攝MV，邀請小師妹甄敏芳擔任MV女主角，鏡頭前二人既甜蜜又開心，Felix話要特別向Jenny嘅粉絲報備，兩人親密程度只屬兒童節目尺度。

Jenny今次唔只做MV女主角，仲會為呢首新歌獻聲，負責歌曲中嘅讀白部份，Felix話成個錄音過程好順利好快，只花咗一、兩個鐘，Jenny即好奇問原來咁叫快，但只係錄一句，Felix即刻話「唔講咪冇人知」，盡現兩人可愛一面。

Jenny加盟公司近一年，Felix話一直冇機會合作，今次合作就非常愉快同順利，Felix仲讚Jenny演技好自然，Jenny話功勞係屬於導演，因為教導得好。