王賢誌（Vinci）前年因拖欠財務公司約300萬港元而申請破產，與同性伴侶Kevin避走加拿大，細妹王賢德於9月16號受訪痛斥哥哥欠下「天文數字」巨債，將「蘇州屎」掉低晒俾家人承擔，王賢誌面對連串風波，於翌日上載片段親回。
細妹王賢德日前接受傳媒訪問，怒斥哥哥不負責任，借下巨款將「爛攤子」推畀家人，指300萬債務只係阿哥真實欠債數目嘅冰山一角，以「天文數字」真實欠款，王賢德又稱最心寒係阿哥竟然叫債主直接搵兩位胞妹討債，家人無辜承受恐嚇騷擾，怒斥阿哥自私兼不負責任，「拍拍屁股就走咗去加拿大」。
細妹王賢德澄清父母住院費早已全數繳交，絕冇需要借錢籌醫療費用，痛罵阿哥「一蚊都冇出過」，而王賢德稱阿哥移居加拿大後，社交平台封鎖兩位胞妹，今次公開家醜，王賢德只係想保護父母，防止養老金被敗光，更向債主表明王賢誌嘅個人債務與王家無關，正式與王賢誌劃清界線，警告債主切勿再騷擾王家。
王賢誌沉寂一日後開直播，親自回覆正在積極面對中，「不過牽涉到家人真的感到愧疚」。王賢誌為王氏港建創辦人王華湘嘅孫仔，家族曾坐擁30億資產，而細妹王賢德受訪時透露阿哥喺加拿大「自立」人設，至今仍依賴家族資助生存，呼籲阿哥盡快腳踏實地工作。
