國際影星楊紫瓊夥拍內地實力派演員劉昊然主演勵志喜劇《魔方小姐》，呢套係楊紫瓊憑《奇異女俠玩救宇宙》勇奪第95屆奧斯卡「最佳女主角」獎項後，首部回歸華語影壇嘅重磅作品，備受香港影迷期待。
電影改編自真人真事，講述70歲主角「趙艷紅」不甘於養老院嘅平淡生活，喺意外發掘出驚人魔方天賦後，與前魔方世界冠軍劉昊然結成師徒，勇敢闖入競爭激烈嘅魔方世界。楊紫瓊話與角色最大共通點就係「固執、不服輸」：「我不會讓年齡限制自己，人生無論到了什麼階段，都可以繼續擁有夢想。」
楊紫瓊為咗完美演繹魔方高手，花咗將近兩年時間苦練魔方。佢坦言最大挑戰並非技巧，而係導演對速度嘅要求，以及極高專注力：「拍攝時我基本上無論去到哪裡都帶着魔方，一直練習，不過拍完後技術已經『還給老師』了。」
由於電影故事背景設定係廣東，劇本本身就安排雙語交替，楊紫瓊喺戲中自然切換華語與粵語對白，與其身背景相似。楊紫瓊笑言：「我平時和媽媽及不少馬來西亞朋友都是以粵語溝通，所以演起來格外親切、自然。」
問到喺現實若果70歲先發現魔方天賦會否參賽，楊紫瓊毫不猶豫地笑言：「Why not！」楊紫瓊認為人生就好似一個不斷被打亂、又不斷復原嘅魔方，每一次重新拼湊都係學習。楊紫瓊希望透過《魔方小姐》傳遞正面訊息，打破社會對成功狹窄定義，同時感受戲中呢場充滿笑聲與淚水嘅動人追夢之旅。
