鼎爺 李家鼎 嘅前妻 施明 今年三月病逝，事後鼎爺指控大孖 李泳漢 隱瞞施明死訊兼長期苛索金錢，之後更獨攬施明身後事處理大權，拒絕透露施明安葬地點，令見唔到施明最後一面嘅鼎爺同細孖 李泳豪 傷心欲絕，更因而同大孖正式決裂，心力交瘁嘅鼎爺更因此暴瘦，健康情況令人擔憂。
事隔半年事情終於有轉機，豪仔於18號喺社交平台上載咗一張同母親施明嘅舊照，透露喺熱心人士協助下，經已成功搵到施明骨灰安葬地，已完成上位儀式。豪仔寫道：「感謝在這些日子裏有很多熱心、善心人的幫忙，在他們關懷及協助下終於找到我媽媽的骨灰位並確實在今早已上位，衷心感謝你們，無言感激。」
施明終於入土為安，鼎爺同豪仔總算可以放下心頭大石。同日鼎爺返電視城開工，見佢肥返啲，精神狀態都唔錯，對於施明已完成上位儀式，鼎爺亦親證屬實，但就表示唔想多作回應。
鼎爺回復元氣，豪仔兩公婆功不可沒，無論衣食住行都照顧周到，鼎爺話細仔同細新抱好緊張，除咗照顧飲食，又叮囑佢做運動，唔好成日坐同瞓。見鼎爺講嘢中氣十足，相信觀眾都好希望可以見到佢再揸鑊鏟，繼續教大家煮好餸，鼎爺 表示只要有通告，就會繼續工作，甚至連拍劇都冇問題，只要唔好夜接早咁拍就得。
