《中年好聲音4》唱將完成比賽之後，大家陸陸續續開見面會答謝粉絲支持，蔡宓婕首度舉行粉絲活動，呢個重要時刻，Mimi老公同囝囝當然唔會缺席，仲有一大班中聲戰友撐場。
一班中聲戰友獻唱完全冇難度，但要佢哋講嘢就唔係個個都咁叻，Mimi特登出考題，要大家輪流訪問佢，搞到雷小雷要出動貓紙嚟問，不過雷小雷唔純正嘅廣東話就引發笑料。
見面會上，點會少得唱歌助興環節，Mimi揀咗比賽中唱過嘅《上海灘》跟黃建東一齊合唱。Mimi眼見一班愛錫自己嘅家人、戰友同粉絲，再回想過去一年忙於比賽，又要返工同照顧家庭嘅日子，同時面對網上負評，Mimi非常感觸，壓力之大可想而知，重提參賽歷程，Mimi講講吓，情緒激動淚流滿臉。
