樂壇「校長」譚詠麟嘅演唱會下半場正式開始全新章節，經過兩日休整後，下半部第6場起改以「情不變篇」為主題，換上全新歌單繼續演出。演唱會現場星光熠熠，眾多圈中好友現身支持，好似陳奕迅、曾華倩、張國強、蘇志威夫婦，以及早前已欣賞過「無言感激篇」嘅大劉（劉鑾雄）與甘比（陳凱韻）夫婦亦再度現身捧場，足見校長嘅人緣同號召力。
由網上曝光片段可見，現場響起校長代表作金曲《朋友》時，全場萬名歌迷一同高聲大合唱，場面極為溫馨震撼。面對歌迷熱情又真摯嘅歌聲，站於台上默默聆聽嘅校長難掩內心激動，表情充滿滿足與感恩，更一度感觸到眼濕濕要以手拭淚。強忍淚水嘅校長隨後向全場歌迷比 Like示意，表達深切謝意。
