殿堂級歌后葉麗儀與陳潔靈將於9月底喺東九文化中心劇院隆重舉行經典演唱會，是次演唱會特別邀請著名音樂人Johnny Yim擔任音樂總監 ，帶領17人現場樂隊，重新演繹多首經典金曲，為觀眾帶嚟視聽雙重盛宴，兩位歌后近日與製作團隊正式進入密集綵排。
葉麗儀與陳潔靈今次合作前已做足充分準備，包括反覆研究歌單、調整演繹風格，以及與音樂團隊多次溝通編曲細節，早於半年前開始準備，正式綵排第一日開始便異常順利，就連音樂總監Johnny Yim都忍唔住驚訝：「點解一開始綵排已經咁順利？兩人嘅狀態、默契同對歌曲嘅理解，明顯係提前落咗好大工夫。」
葉麗儀與陳潔靈坦言面對東九文化中心如此精準、高要求嘅音響系統，最初確實感到壓力：「呢個場地太靚、太清楚，任何一點瑕疵都會被放大。正因為做足功課，綵排時反而覺得好輕鬆，可以更專注於音樂本身，同埋與觀眾連結 。」陳潔靈話兩人喺籌備期間已各自準備歌單，並就多首經典曲目進行深入討論，讓觀眾感受截然不同嘅詮釋。
兩位歌后強調呢場演唱會唔只重溫經典，更希望與觀眾分享「多面的自己」。葉麗儀表示舞台上嘅自己可以溫柔、堅韌，亦可以大膽嘗試新編排嘅創作者，陳潔靈希望觀眾睇到佢哋願意突破、享受音樂過程嘅一面，而陳潔靈喺呢次合作中，特別發掘葉麗儀潛能，主動鼓勵葉麗儀嘗試更多新音樂表達方式， 今次綵排睇到葉麗儀願意跳出舒適圈，陳潔靈覺得好開心。
音樂總監Johnny Yim對綵排進度表示滿意，17人樂隊與兩位歌手配合已達到相當高默契，編曲既能保留經典原味，又注入當代元素，配合沉浸式音場，預期現場效果將十分震撼，進一步提升視覺與聽覺整體體驗。
