性感女神邱淑貞嘅大女 沈月 ，日前同人氣韓國女團 BABYMONSTER 同場出席活動，幫爸爸沈嘉偉旗下嘅服裝品牌造勢，現場聚集大批BABYMONSTER粉絲，幾位成員一出場，尖叫聲大到幾乎要震破耳膜。
沈月話自己都好鍾意BABYMONSTER，平時亦有聽開K-Pop，仲會自己喺屋企唱歌跳舞，不過講到會唔會入行，佢就話暫時冇乜興趣，加上爸爸媽媽驚佢辛苦，所以應該唔會考慮加入娛樂圈。
沈月出名係最靚星二代，身邊一定好多追求者，不過佢就話因為自己標準太高，所以一直搵唔到合適嘅對象，而且自己性格唔鍾意拖泥帶水，所以覺得唔適合就會直接拒絕。問到擇偶標準時，沈月就話一定要靚仔，話起碼要有金城武咁嘅顏值喎。
沈月同屋企人早前去咗韓國旅行，影咗好多靚相，有好多人都話佢越嚟越似媽咪邱淑貞，不過沈月就唔認同，佢大賣口乖話媽咪係世界上最靚嘅人，佢嘅美貌無人能及。