現年39歲嘅 王君馨 與任職銀行家嘅老公 Daniel結婚多年，家庭生活甜到漏。繼去年喜迎大女Audrey後，Grace月前已再報喜懷有三胎，佢日前出席活動時仲開心公開第二胎將再係小公主，之後Grace又喺社交平台分享，佢同老公及一眾親友舉辦性別揭曉（Gender Reveal）派對，以別出心裁方式向大家揭曉BB性別。
影片中可見，派對現場佈置多個「IT'S A BOY」同「IT'S A GIRL」氣球。Grace同老公Daniel手拿高腳玻璃杯，同心協力塞入白色蛋糕中，又不斷叫現場好友估腹中BB性別。當兩人以酒杯取出小塊蛋糕時，就明顯見到代表女孩嘅粉紅色內餡，令全場瞬間尖叫聲四起。
夫妻倆亦激動得相擁大笑、興奮高呼，隨後仲抱起大女Audrey一同慶祝，更溫馨笑言希望姐姐未來會好好照顧妹妹，一家四口洋溢著滿滿幸福，準備明年一齊迎接第二位「小公主」。
Grace同老公Daniel嘅愛情故事有如劇集故事，兩人早於19歲時於美國紐約相識並一見鍾情，雖然曾歷經長達11年嘅異地戀，中間更因相隔遠距而短暫分手。但兩人其後重修舊好，Daniel於2017年結婚後更毅然放棄美國事業移居香港，全力支持Grace演藝圈同音樂道路上發展，堪稱模範夫妻。明年將迎接第二胎降臨，不過Grace上次就經歷難忘嘅分娩過程。佢曾指當時臨時「轉軚」放棄剖腹選擇自然分娩，經歷十多個小時陣痛後順利誕下大女Audrey。當時老公Daniel全程在旁悉心照顧同陪伴。如今兩人再傳喜訊組建四口之家，一眾圈中好友都紛紛留言送上熱烈祝福。
