鄭俊弘 同 何雁詩 早前將患有罕見病「天使綜合症」嘅4歲囝囝 鄭讚廷（Asher）送往加拿大生活，交由長輩照顧，而兩人就輪流赴當地照顧囝囝。報道一出，隨即惹嚟網民狠批，質疑佢哋「棄養」Asher，加上何雁詩之後又上載咗一張喺豪宅打麻雀嘅相片，表現得好寫意，因而令網民更加反感，批評佢只顧玩樂，放棄理會囝囝。
日前Fred接受已移居加拿大嘅《東張西望》前主持 容羨媛 網上頻道訪問，Fred首度開腔回應呢場棄養風波，首先佢表示自己無留意任何有關嘅報道，亦都唔想回應被指「棄養」一事，佢只係話安排囝囝移居加國，主要係因為當地嘅醫院設有「天使綜合症診所」，醫療上可以更配合囝囝嘅需要，加上醫生同治療師對呢個病好有經驗，所以佢哋兩夫妻先作出呢個重大決定。
Fred又透露Asher喺今年6月已移居加國，9月亦正式入讀當地嘅特殊學校，佢表示學校共融嘅學習環境，令囝囝好快適應新生活。 對於Asher而家其實好需要父母喺身邊，佢哋點樣分隔兩地去照顧時，Fred就表示自己而家工作上算係自由身，所以照顧Asher上會更有彈性，而呢次亦會逼留喺加國較長時間，仲同太太大派定心丸：「你唔駛擔心，呢度有我喺度照顧到阿仔，你請到假咪即刻飛返嚟，我哋可以一家人一齊。」至於有無諗過喺加國長期工作？Fred就表示有諗過修讀音樂治療課程，既可以幫到囝囝，又可以多啲留喺當地陪伴。
訪問出街後，唔少網民都留言表示支持Fred，並大讚Fred絕對係好爸爸，而另一邊廂，正喺香港工作嘅何雁詩，喺出席活動時，亦就近日嘅風波開腔回應，佢表示放打麻雀相上網，只係分享自己正常社交生活，無諗過會惹嚟批評，而佢亦強調自己事事以囝囝為先，至於被指「棄養」，佢就表示唔係真實，亦唔知點解釋，總之自己一定唔係放棄兒子。
