潘靜文 呢日現身粉絲為佢舉辦嘅應援活動，宣傳新歌〈遺憾還是會完〉，一眾粉絲精心為場地進行佈置，準備咗多款應援物，而Sherman亦對大家嘅要求有求必應。
今次新歌以遺憾作主題，佢就話自己都有被歌詞而感動，當中有好多句佢都好鍾意，當中一句「人不過是人有心癮」歌詞，令佢覺得有時以為自己忘記到一個人，但當喺社交媒體見到對方嘅近況或者真人，就會知道自己個「癮」仲依然喺度。
Sherman指每次創作一首新歌，自己都會同填詞人去講自己點解會創作呢首歌嘅經歷同原因，但喺每次同填詞人溝通時，佢都糾結係咪要講真話，Sherman指由於好想作品可以代表到自己，所以佢都會講明經歷係真人真事，Sherman笑言填詞知道好多歌手不為人知嘅秘密呀。
早前Sherman罕有地喺社交平台分享一輯寫真靚相，唔少網民都讚佢有種健康美，Sherman就話自己都想影多啲呢類相，但就要自己鼓起一定嘅勇氣先可以，因為平時佢連着背心出街都唔會。
最近有份參演處境劇《愛．回家之三代同糖》，當中造型仲被網民指同動畫人物撞樣，對此Sherman就同大家分享加入劇組後嘅感受，仲話希望可以有多少少時間休息呀。