中聲唱將 李佳 接受主播 潘盈慧 《Sing光路上》專訪，除咗分享昔日喺上海酒廊唱歌嘅經歴之外，佢仲自爆自己當年非常任性反叛，曾經傷透媽媽嘅心，直到父親離世，令佳佳一夜成長，佢話父親喺音樂上對佢都有幾大影響，所以呢次佢演繹翻唱歌《追憶》時，都勾起好多同爸爸相處嘅點滴。
而參加過無數大大小小歌唱比賽嘅李佳，表示曾經參加過一個比賽，出色嘅表現令佢位列前茅，但如果出錢，佢就分分鐘可以坐亞望冠，但佳佳堅決反對以呢種手法獲取榮耀，佢話：「買過嚟嘅榮譽我唔要，我就退賽。」直到《中年好聲音》嘅出現，重燃佳佳對比賽嘅熱情，亦大大提高佢嘅知名度，直到比賽嘅中後段，佢努力爭取演繹《上海灘》並取得MVP，佳佳話佢希望嚟緊可以舉行小型音樂會，可以同粉絲有更多互動。
