古天樂 旗下嘅舞台製作單位「天下一幕」早前推出嘅頭炮劇目《大龍鳳》叫好叫座，近日宣佈全新作品《Rabbit Hole 心渦》登場，演出陣容包含劇場、影壇實力派同新生代演員 張繼聰 韋羅莎 余安安 以及兩位矚目新人 譚旻萱 同 羅文澤 ，幕後班底同樣豐富，更由資深劇場導演；韋羅莎丈夫張銘耀執導，帶領觀眾直面人生嘅失落與重生。
《Rabbit Hole 心渦》曾榮獲美國百老匯最高殊榮「普立茲戲劇獎」，亦曾被奧斯卡影后妮歌潔曼改編監製同主演同名賣座電影。劇目將於明年1月8日起假藝術中心壽臣劇場公演。門票將會星期二中午開售。
張繼聰早前為《大龍鳳》擔任監製，今次於《Rabbit Hole 心渦》就身兼監製同男主角，阿聰話解釋：「上次係喜劇，呢個係正劇，有少少溫暖，主題講家庭、失去，可以話係我出道以來其中一個難度最高嘅劇本，好有挑戰性，加上每個角色都寫得好好，作為演員確實無可抗拒，好期待！」
佢仲話由Rosa擔綱女主角係最佳選擇：「一個出色劇本需要非常有實力嘅演員，無論劇界定電影圈，Rosa都係公認好演員，加上導演German同Rosa，咁多年來由同學到夫妻一直好有默契，同佢哋合作，我可以放一萬個心。」
導演German表示故事聚焦主角一家面對至親離開嘅情感角力，牽涉唔同拗撬、後悔等，女主角Rosa透露：「最大挑戰係好多對白，角色又有好多層次，要盡量演出自然，不能太過火去演繹呢個悲痛角色，必須同對手好有默契，真係唔容易！」今次同導演老公German一直合作無間，Rosa笑指：「其他演員收工後就可以休息，我返屋企就繼續要面對導演，但好多時排咗成日，返屋企彼此俾啲空間大家。」
余安安繼多年前《仲夏夜之夢》後再踏台板，佢指：「劇本非常好，相信個個演員都好想參演，我覺得好幸福，希望可以擦出火花。」劇中佢扮演Rosa同Mandy嘅媽媽，表面精靈就帶啲傻氣，本來好愛惜兩個女，但用咗錯誤方法，為Rosa帶來二度傷害。」
安安姐嘅好女婿阿聰，記者會上被要求完成多個唔同任務，好似即場向老闆古天樂傳短訊要求加人工，事後佢話：「莫講要加人工，而家我攞咗老闆一大筆錢，佢咁信我專業判斷，感覺好大責任，希望不蝕本就好喇！」
Mandy抱病出席專業精神可嘉，首次參演舞台劇嘅Mandy直言心情緊張：「我要努力背熟自己同對手全部對白，希望萬無一失！我同角色性格有啲似，導演叫我放膽演，對手點都會接得住，所以我開心多過驚。」