梁詠琪於2000年親自作曲填詞，譜寫經典曲目《花火》答謝歌迷風雨相伴，近日Gigi再次以唱作人身份創作全新作品《溫柔的存在》。Gigi解釋今年入行三十年，新歌希望藉着曲詞，與當年創作《花火》時嘅自己再一次對話。
Gigi解釋話：「《溫柔的存在》五個字幾年前已出現喺腦海，當年我喺森林襌修時同大自然為伴，一樹一木一片雲嘅陪伴，就係一道溫柔的存在，賦予我生命力同力量。今年新專輯同創作就決定用呢幾個字作主題核心，同歌迷分享我嘅狀態同感受！」 《溫柔的存在》再次利用《花火》嘅和弦，譜上新旋律同歌詞，延續《花火》嘅迴響。
Gigi更再邀請原班人馬，包括最佳拍檔 陳少琪 擔任監製、台灣導演 林錦和 再次操刀拍攝MV。Gigi笑稱：「既然係復刻《花火》嘅精神，新MV亦一樣要復刻版！當年監製同導演一齊參與，完全復刻當年《花火》MV嘅佈景同運鏡，唯一唔同嘅就係我已係成長版Gigi。」
今次粵語同國語歌詞都由Gigi包辦，粵語用「花」、國語用「雲」表達對生命嘅理解，Gigi希望藉著《溫柔的存在》帶出近年對人生嘅感悟，擺脫多愁善感，釋放愉悅自嘅通透心情，她解釋話：「《溫柔的存在》冇《花火》感嘆生命短暫同不完美嘅糾結，歌詞中『來吧伴我飛，不休不睡去飛，來盡力忘記，兩腳降落何地』，今日可以更灑脫勇敢咁話『飛千百里，愛也具備，不盡完美，一些不必再記起』。」
MV為「原汁原味」，當中一共有9個Gigi穿梭在鏡頭中，唔同造型事前更一共準備了30套服裝，每一組運鏡同走位為準確無誤，MV就花足15小時拍攝，雖然過程艱辛雜亂，不過台前幕後見到復刻MV誕生都非常高興。 Gigi仲同時希望藉《溫柔的存在》，答謝歌迷一直以溫柔嘅力量陪伴同支持；Gigi亦希望自己可以成為歌迷心目中最溫柔嘅存在，以作品作陪伴同鼓勵。
