日前被正於紅館開騷嘅好友 譚詠麟 笑指切完燒豬就唔見咗人嘅 鍾鎮濤 ，原來已飛往大馬再到雲頂舉行演唱會。去年B哥哥就曾於當地舉行《及時行樂》巡迴演唱會首站，當晚全場觀眾由頭到尾一直同B哥哥大合唱，主辦單位有見氣氛熱烈，於是再度邀請B哥哥再度重臨雲頂舉行個唱。
今次佢再度帶同兩位心愛千金 鍾懿 同 鍾幗 同踏舞台，三父女再度展現音樂默契，歌迷亦繼續全場大合唱，一家人與觀眾提前開心迎中秋。
演唱會期間，Blythe於觀眾面前，現場演繹佢人生第一首粵語單曲《To Leslie with Love》，向近日 70 歲誕辰嘅一代巨星「哥哥」張國榮致敬。Blythe又感性話雖然自己從未親眼同哥哥見過面，但「張國榮」對佢一啲都唔陌生。佢話：「因為爹哋嘅關係，屋企經常會播起哥哥嘅歌。佢嘅音樂、電影，其實一直都陪伴我長大。」
Blythe又話：「我覺得非常榮幸可以唱到呢首歌，呢首歌嘅歌詞全部係用咗Uncle Leslie過往嘅歌名同歌詞去創作，係好有紀念意義嘅一首歌。」鍾懿呢晚亦特別獻唱電影《給阿嬤的情書》嘅主題曲《月下煮茶》，首次挑戰唱潮汕語，事前更特別苦練。
B哥哥亦現場演譯「鬼馬詞人」黎彼得嘅兩首名曲《玩吓啦》同《浪子心聲》，B哥哥又分享Pater哥嘅過往：「黎彼得年輕時有另一個筆名叫柴可夫，因為佢係做司機嘅，而佢同許冠傑合作之前，其實係同溫拿合作，當時我哋溫拿有個節目需要主題曲，結果就搵咗陳友呢位「柴可夫」朋友幫我哋作咗頭一段，然之後由霑叔就完成埋，就成為咗呢首《玩吓啦》。」
黎彼得因為呢首無心插柳嘅「作品」，之後由司機變成一位填詞人，更同歌神許冠傑合作創作大量膾炙人口嘅經典金曲。對呢位作品豐碩嘅填詞人離世，B哥哥覺得非常惋惜，所以特別於演唱會中緬懷佢嘅經典作品。