張文慈（Pinky）、張柏芝同鄧萃雯因共同宗教信仰而結緣，私下感情深厚，近年三人將工作重心轉移至內地，大家有更多時間相聚，柏芝與雯女近日特地結伴飛去上海，同Pinky提早慶祝生日，果然係閨密情深！
Pinky噚日喺社交平台曬出閨密合照，指佢哋5年前喺上海同一間餐廳食飯，五年後再次喺同一地方相聚，為Pinky慶祝生日，相中見Pinky收到新手機及手袋等禮物，之不過最讓Pinky感動係呢份難能可貴嘅友情，「可能有時大家各自忙 ，但真正的好朋友會掛念，有事永遠出現，感恩遇見，有你們真好，昨晚真的好開心，無所不談」。
Pinky以前透露啱啱去內地發展，曾羨慕別人用名牌手袋，柏芝得知後立刻大方送佢名牌手袋作為禮物，又試有次喺內地做善事，但Pinky當年經濟有限，柏芝就主動以張文慈名義代為捐款，幫助有需要嘅人，可見柏芝對朋友有情有義，而柏芝曾喺節目中透露自己係唔太擅長交友，因為害怕受傷而唔敢延續友情，但Pinky與雯女嘅真誠與陪伴，讓友誼打破咗呢個「魔咒」，彼此成為長久知己。
