鄭秀文 Sammi 日前於尖沙咀舉行 LP 簽名會，簽名會正式開始前Sammi先同大家玩遊戲做熱身，期間台上一位女歌迷突然衝上前擁抱Sammi並落淚，工作人員見狀即上前解圍；而另一位女歌迷亦上前擁抱並喜極而泣，引來台下陣陣起哄。向來寵粉嘅Sammi，最終與主持Donald合力「出貓」，令四位參與遊戲嘅fans都可將獲得同佢單獨合照嘅機會。
為答謝大會提供場地及贊助，Sammi特意準備咗親筆簽名嘅全新黑膠LP率先送給華人置業集團行政總裁兼執行董事劉陳凱韻（劉太）。而劉太則回贈親手織嘅黑膠碟造型斜孭袋和小手袋畀Sammi，對於呢份咁有溫度嘅手作禮物，Sammi愛不釋手。
提到今次嘅LP創作與設計理念，Sammi 表示：「全部歌都係我親自挑選，當中有side track，全部都好代表到嗰個年代嘅Sammi。我用『初』字，想將音樂去返最『初』，我嘅原點。字上面有幾塊葉嘅構思都係我諗，樹木嘅成長從幼苗開始。其實就個『初』字，我都花咗好多心機。」
相隔8年再搞簽名會，世界各地歌迷都趕赴現場見偶像，唔少人仲一見到Sammi就忍唔住喊。對於今次簽名名額只得600個，Sammi表示好唔夠：「除咗香港嘅歌迷，仲有好多來自世界各地嘅歌迷，有啲要搭飛機、長途車，我真係好感動呀！呢種來自心底裏好真誠嘅支持同渴望，我會格外珍惜，會做多啲好嘅歌回饋俾佢哋。」
中秋將到澳門演出，之後就要啟程到外國工作，行程相當緊密。至於早前Sammi曾透露「三米飯糰」（歌迷會名稱）今年內會再辦聚會一事，佢就話正積極籌備中，會喺適當時候公布詳情。
