黃翠如與蕭正楠結婚多年感情甜蜜，走過流產陰霾後，二人於2025年3月迎嚟兒子「蕭哈哈」出世，一家三口幸福美滿，翠如近日作客TVB節目《健康誠諾書》，首次揭露飽受子宮肌瘤困擾，於陀「蕭哈哈」懷孕初期，去到剖腹產子一直與瘤共存，生B過程亦好驚險。
myTV SUPER《健康誠諾書》面對生育難關
翠如於2024年7月底以「特派專員」身分赴巴黎奧運採訪，當時佢已知懷有身孕，透露因之前經歷小產，令佢唔想同任何人分享，嗰刻只係同醫生分享，醫生叫照樣帶備安胎針，每日都幫自己打一針，而懷孕期間更面臨子宮肌瘤隨住胎兒成長變大，剖腹產子時，腹內嚴重發炎，BB心跳不穩等險象。
翠如坦言自細受嚴重痛經折磨，中學時期曾兩次因痛經要叫救護車送院，當年佢誤以為「個個女仔都差唔多」，直到懷孕後期，胎兒尺寸停滯不前，體內子宮肌瘤卻不斷吸收營養長大，入院待產檢查胎心時，翠如坦言醫護人員檢查咗個幾鐘都默不作聲，讓翠如意識到係有啲嘢，但係佢哋又唔會講，去到生出嚟之後佢哋先講，原來醫護人員係好擔心，最驚險就係開刀剖腹嗰刻。
翠如直言當時醫生發現其子宮情況極度惡劣：「佢哋話BB心跳唔正常，佢懷疑係我情緒影響BB，因為我開刀嘅時候，醫生就話我成個肚裏面都發緊炎，好多好似割（開）嘅傷口，子宮肌瘤有好多好粗嘅血管圍住。」醫生小心翼翼避開血管同肌瘤，順利將「蕭哈哈」平安取出，而翠如至今依然與該子宮肌瘤「共存緊」。
翠如於節目播放後亦有感而發，覺得最重要承諾係好好照顧自己，「母子平安從來唔係理所當然，只有自己健健康康，先可以陪蕭哈哈慢慢長大，一齊睇更多風景，陪伴佢走更遠嘅路，呢份守護同支持就係我身為媽媽最無私嘅承諾」。
