蕭正楠 同女團 MYNT 六位靚女現身pickleball活動，吸引大批fans與途人圍觀，佢哋輪流落場體驗呢項運動，蕭正楠就話對住MYNT個感覺就好似同自己個女對打咁，因為唔知讓唔讓佢哋好呀。
蕭正楠早前同黃翠如帶埋囝囝去馬來西亞，事前佢哋都擔心蕭哈哈搭飛機時會唔習慣，但點知阿仔變咗親善大使，同全艙人打招呼，一見到有人望佢就揮手say hello。蕭正楠指哈哈完美繼承翠如鍾意去旅行嘅基因，無論去到邊度玩，哈哈都好開心對所有嘢都好好奇，而見到哈哈同當地朋友個囝囝玩得好開心，蕭正楠見到都好滿足。
女團MYNT就首次落場打pickleball，佢哋話平時嘅工作相當緊湊，時間都放咗喺練歌同跳舞上，而呢日可以放鬆一下玩pickleball，除咗感覺好新鮮外，仲覺得好考驗到佢哋嘅默契。倪嘉雯就指自己有打開網球，但佢覺得網球同pickleball係兩回事，因為兩種運動用嘅力都唔同。倪樂琳就指為咗活動佢哋都有上堂學打pickleball，不過因為緊張所以喺現場發揮得冇咁好，而喬美莎就指呢項運動難過跳舞呀。
