鬼馬填詞人 兼 資深演員 黎彼德 上月病逝，家屬星期日於佢曾任校董嘅一所中學舉行追思會，現場展出佢過往所獲嘅填詞獎項，亦以紀念冊分享昔日生活點滴。佢嘅兒子 黎樹德 、姪子等家人到場，唔少好友 鍾志光 陳友 吳雨 郭鋒 余安安 孫慧雪 ，仲有《愛．回家》嘅拍檔 單立文 樊亦敏 同 陳浚霆 許家傑 同 林淑敏 ，羅樂林 張彥博 等都有出席。
大家逐一分享同Peter嘅回憶，而出心出力嘅鍾Sir，就指拍《愛．回家》嘅空檔假期，就會一齊飲茶嘆咖啡，仲聽Peter分享好多昔日嘅有趣故事，可惜往後只能回憶。而豹哥就直指Peter過往作品任何香港人隨口都唱得出，對香港影響大鉅大，認為佢功勞不可抹殺，係樂壇非常重要嘅前輩，至於林淑敏同許家傑亦指Peter哥非常親切。
大會現場播放黎彼德嘅昔日片段，當中亦包括往昔合作無間嘅 許冠傑 ，阿Sam自彈自唱拍攝，形容Peter係自己嘅「最佳拍檔」，以《這一曲送給你》遙祭故友。
