張家輝 同 蒙嘉慧 以及 鍾雪瑩 呢日一齊現身新片啟動禮，近年較少露面嘅Yoyo呢日大受歡迎，仲話呢次一收到邀請就即時答允出演，更係佢同家輝自當年《流氓師表》後再次合作演出。
今次兩人合作扮演一對夫妻，鍾雪就係佢哋嘅囡囡，家輝受訪時就繼續鬼馬，即場將新片同《流》故事串連，指當年有下文後生埋女咁話。
而Yoyo久未出演，就話同舊拍檔合作默契十足，家輝亦令現場氣氛輕鬆，佢仲大讚鍾雪呢位新生代演員天份十足，兩父女仲不斷鬥戲呀。鍾雪就指同「父母」去多個唔同地方拍攝，有如一家人去旅行一樣。
片中家輝嘅頭髮稀疏地中海造型，仲一度令Yoyo認為對手又為演戲犧牲。而家輝就指有擔心黐頭套亦擔心脫髮問題，Yoyo就大讚佢頭型夠圓似足壽星光，非常適合光頭，搞到家輝叫佢求伊健試吓，點知Yoyo就話唔覺有問題，仲即時示愛放閃。
胡楓 早前於影片分享，演唱會後一度因膽管堵塞入院，更昏迷ICU幾日，呢日家輝就慶幸契爺叻仔，仲話一有時間就會親自探望修哥呀。
