江美儀聯同吳業坤、張振朗同曾展望（GM）呢日現身TVB節目《試真D唷》商場見面會，四位主持大跳節目主題曲舞，而活動當日係美儀姐正日生日，大家好有心為佢慶祝生日，坤哥仲解釋屎型蛋糕寓意。
美儀姐嘆氣話唔知點解生日要「食屎」，坤哥話係試真D「視」后，條「視」係好長！而美儀姐今年生日願望係《試真D唷》收視好，長做長有，每年生日都係《試真D》系列播出街嘅時間。
《試真D》由第一輯開始，已獲唔同年齡層嘅觀眾捧場，早前一眾主持走入校園，同一眾學生互動。振朗話今輯拍嗰陣冇諗收視係點，大家盡量試吓，節目收視理想，佢哋都好滿意，美儀姐覺得萬事起頭難，咁開播以嚟收視幾好，希望個勢可以保持落去。
美儀姐、振朗同坤哥喺最新一集試食溫體羊，仲有得食特別嘅羊部位，振朗亦難忘呢次體驗，自己以後都唔會試食呢幾樣嘢，坤哥就讚溫體羊係好食。美儀姐話每集有好食同唔好食嘅嘢，GM之前食過豬眼、豬袋、豬三叉神經、豬胎盤同BB睪丸，美儀姐讚GM好堅，仲話振朗係輸㗎！
《試真D唷》星期日晚 20:00 翡翠台