JW王灝兒 年前宣布結束與美容品太子爺 葉韋彤 7年情後，曾被貼上「只能共富貴」標籤，JW更曾含淚澄清分手全因男方「做咗對唔住我嘅事」，否認拜金。
近年投入事業嘅JW，今日被多間傳媒指感情早已有著落更已開花結果。綜合報道指佢同今年升班香港超級聯賽嘅班主兼球員；更身兼演唱會主辦老闆嘅 王至尊 早已成為一對，JW唔止不時出席球隊活動儼如班主夫人，更盛傳兩人去年已秘密於土耳其舉行婚禮成婚，低調攜手步入人生新階段。
翻查資料，當時JW嘅好友包括 馬天佑 陳懿德 羅天宇 陳瀅 等均曾盛裝打扮出席一個於外地舉行嘅派對，一行人非常高興於一個海邊露台拍片。而之後一行好友加上JW，更轉往埃及一齊旅遊，根據推測似乎係婚禮後同遊慶祝。
雖然JW對新戀情同婚訊非常低調，但傳媒同眼尖網民早已捕捉到兩人放閃嘅痕跡。早前於甲組足球聯賽現場，JW就被目擊身穿男友球隊波衫現身，化身「專屬啦啦隊」為王至尊賣力打氣，兩人又一齊捧盃慶祝。
據指王至尊主修金融兼擁有紐約大學音樂商業碩士高學歷，亦係港超聯同足球界積極推手，日前更以班主兼球員身份上陣球隊嘅高級組銀牌比賽，成為港超史上首位落場比賽嘅班主。佢亦於主辦國際級巨星演唱會嘅Live Nation身任要職，統籌無數大型演唱會同國際音樂節。
雖然坊間今日盛傳兩人去年秘婚消息，不過當事人就尚未正式公開回應。