蔡卓妍（阿Sa）今年4月與細10歲嘅健身教練林俊賢（Elvis）結婚，阿Sa先被傳身形圓潤，其小腹微微隆起，跟住又無辜捲入私隱外洩風波，被風水師與地產經紀披露阿Sa剛租下東半山豪宅「眺馬閣」頂層相連單位，接二連三嘅傳聞似乎未有影響阿Sa心情，阿Sa依然沉浸喺新婚甜蜜與充實工作當中。
Twins早前宣佈今年12月喺灣仔會展舉行一連三場Sidetrack演唱會。消息一出，門票於優先訂購及公開發售後迅即被掃光，一票難求。今日（22號）宣佈加開12月21及22日兩場，值得一提係，今次呢個Sidetrack演唱會係「香港限定」，絕不巡迴，歌迷絕對要把握機會。
對於連加兩場，阿Sa同阿嬌希望「夠數還飛債」。Twins呢次Sidetrack演唱會，顧名思義會唱一啲平時較少喺台上演唱嘅「滄海遺珠」，現階段唱回呢啲歌，二人坦言感覺一定會有唔同，特別係唱早期歌曲，「當時聲線仲係好幼嫩！例如《百試不厭》、《有所不知》，其實每一首歌一去到個台度，每一次唱都會有唔同嘅感覺，係好神奇嘅！有啲歌以前唔係太大感覺 ，而家聽番覺得『乜原來呢首歌咁好聽』，例如《加油》，有啲歌永遠唱嘅時候都會眼濕濕，例如《友誼第一》。」
Twins最希望每次演唱會都帶俾觀眾一個開心、放鬆、可以忘記平時生活壓力嘅一個時間同空間：「呢個氛圍係雙向嘅，大部份時間都唔係淨係我哋帶俾大家，因為通常入得場睇我哋演唱會嘅觀眾，都係好歡樂。」
