轉戰演藝圈嘅「羽毛球王子」 江博熙 近日首次同只得16歲嘅親細佬 江柏熙 「合體」，為服裝品牌拍攝宣傳片。兩兄弟同框亮相騷俊俏一面，不過幕後就擦出唔少搞笑火花，仲為拍攝現場增添唔少歡樂氣氛。
Hei呢次同「細細佬」一齊參與工作，仲話要平分酬勞，更加話媽媽生日在即，兄弟會合送新手機做生日禮物孝敬母親。
「細細佬」Tony仍係中學生，同時亦係排球運動員，今次初面對鏡頭拍宣傳片，亦坦言心情難免緊張喇：「阿哥經驗比較豐富，拍攝前叫我早啲瞓覺休息，同埋教我影相擺Pose，展現自信。」佢哋仲喺鏡頭前互餵薯片，又復刻童年照，畫面非常有趣。
Tony又指有哥哥同場所以好快就放鬆，拍攝亦越來越投入。而Hei對呢次難得合作就話：「真係從來無諗過會一齊拍廣告，感覺好得意，佢好叻、好淡定。10分滿分有7分。我就有7.5分，高佢少少！」
原來呢次兄弟檔演出，係因為Hei希望呈現溫馨又舒適嘅親密感，於是主動提議叫細佬參與拍攝，不過就要Hei話：「第一時間問媽咪，佢好爽快就答應，大家都覺得難得有呢個機會，製造一個特別嘅回憶。」拍攝當日父母亦在場支持。
當提到Tony會否正式入行時，佢就話：「佢年紀仲細，現階段最重要任務係專心讀書，同時好好發展排球運動員生涯。」仲話兄弟倆平時會一齊做運動同跑步，又展望未來有機會再接拍家庭用品廣告。