泰國新生代女演員Lookmhee與拍檔Sonya主演GL劇深受粉絲喜愛，常受邀舉辦海外粉絲見面會，日前佢哋作客TVB娛樂新聞台《StarTalk》訪問，二人嚟香港好多次，Sonya讚食物非常好食，二人好鍾意食街頭小食，並介紹新劇《鄉村羅曼史》。
Lookmhee與Sonya主演嘅喜劇已於myTV SUPER 平台上架，免費開放給香港同澳門觀眾睇，Sonya覺得呢套劇有一種趣味同喜感，Lookmhee話二人以前多數演正劇，今次可以帶喜劇風格畀粉絲，佢哋都好開心。
Lookmhee覺得呢次最大挑戰係開工每日要同動物相處，Sonya話一開始要係咁曬太陽有啲唔習慣，而家都慣晒，但自己就用咗好長時間進行曬後皮膚修護。
《鄉村羅曼史》講千金大小姐 Si 為咗拯救家族生意，被迫答應與鄉下女地主 Klao 結婚，以換取一份重要嘅土地租約，二人生活方式截然不同，卻要喺同一屋簷下生活，原來只係利益交換嘅婚姻，後嚟變成一場爆笑又甜蜜嘅愛情故事。
Lookmhee與Sonya自2024年拍劇集《愛情詭計》後，呢次係佢哋第三次合作，Lookmhee覺得二人演親密戲時有更多信任，一齊演出更安心，Lookmhee話完全係靠二人默契，彼此一拍即合，然後就順住劇本發展落去，二人仲選出劇集最難忘場口添！