羊年賀歲電影《食住上》日前舉行開鏡拜神儀式，新作由 蔡卓妍 、林峯 領銜主演，加上朱栢康 胡定欣 許恩怡 梁雍婷 女團VIVA，同李靖筠 陳海兒 何佩瑜 楊天宇 洪助昇 等參與，電影公司更指更多強勁卡士尚未曝光。
電影公司老闆 楊受成 率領一眾星級演員出席開鏡禮，齊心祈求拍攝順利，仲話希望新年為觀眾獻上一部充滿歡笑、人情味同視覺美味嘅開心大作。 新片顧名思義同「食」有關，阿Sa指今次將會飾演一位字字珠璣、作風辛辣嘅頂級食評，將會同林峯飾演嘅廚師碰撞出唔少火花。二人仲特別為電影上堂學習烹飪技巧，席間阿峯仲大顯身手，主動切燒豬分發俾大家。 阿Sa接受訪問時率先講：「我兩年前已經聽過呢個故事，導演有提過當中有個角色好適合我，仲同『食』有關，我覺得真係非常適合，所以一直都非常期待呢個角色。」再次參演賀歲片嘅佢認為農曆新年最緊要開心，人開心來年就會過得好吉利喇。
林峯亦非常同意呢個諗法，佢仲話：「唔止觀眾開心，我哋拍攝過程中都好開心。因為我哋演員眾多，戲中仲有好多插曲。」阿峯仲話開拍前已非常期待：「因為對上一次演廚師已係廿幾年前。當時真係要學中式拋鑊，呢次Fusion啲，唔使拋太重嘅鑊，不過都有好多新技巧要學習。」
除男、女主角外，今次演員陣容亦非常新鮮，好似飾演阿Sa天敵、於戲中處處針鋒相對嘅 朱栢康；而 胡定欣 就飾演在公在私都同阿Sa拍住上、作風沉穩嘅閨蜜兼經理人；仲有造型耳目一新、飾演攝影師嘅 何啟華 。
此外，電影仲有一眾備受矚目嘅新生代同實力派演員加入。而導演羅耀輝就話：「『食』係每逢過農曆新年最核心嘅靈魂，無論過去一年順流逆流，一家人坐定定、齊齊整整食餐好，就係最大幸福。新戲就係希望在充滿喜慶嘅賀歲檔，透過大銀幕為觀眾傳遞正能量。」
