歌手 林欣彤 嘅情緒狀況備受關注，去年9月佢突然喺英國開直播，以顫抖聲線表示遭陌生男子追殺，引嚟極大關注。其後Mag嘅經理人指佢當時因為擔心颱風影響航班，趕唔切返香港照顧愛犬而情緒失控，需要喺當地醫院留醫。
直到今年1月，Mag終於喺社交平台報平安，形容自己受到過百巫師攻擊，又指自己精神不穩，經歷嘅痛苦係完全超乎想像，之後佢又再次停止更新近況。
直到9月22日，神隱已9個月嘅Mag終於再更新社交平台分享一段影片，片中所見佢喺愛犬陪伴下，喺鋼琴前自彈自唱，狀態似乎唔錯。佢仲感性寫道：「很久沒見，大家好嗎？原來我已經9個月沒出post了，決定了出post錄歌時，百感交集，很需要勇氣。這段時間面對了很多之前沒有想像過的難關，但也有很多很多恩典值得感恩，最重要的始終是愛。您們呢？過得怎樣？希望大家內心是平安的。我依然希望在高高低低的生活中，繼續以歌聲陪伴著您們。」
阿Mag更憑歌寄意，送上一首《詩篇42章1節》英文版經文為歌詞嘅歌曲送比歌迷。
動態一出，隨即引起極大迴響，多位圈中朋友都紛紛留言力撐，好似王祖藍、阮小儀、鍾舒漫、陳慧敏等等，亦有唔少網民留言送上支持「好好休息，我們靜待你歸來。」、「每日都有好努力為您祈禱架」、「什麼時候回歸樂壇」、「見返你就好，好掛住你」。