每年中秋節 羅啟豪 嘅歌迷會都會同社企合作推出月餅，今年亦都唔例外，為咗表達心意，今年啟豪早已訂購唔少禮籃，陸續送到唔同前輩同朋友手上，並親手寫上祝福。
啟豪話：「我比較慢熱內向，唔會主動打開話題，平時睇到一班前輩，雖然保持禮貌與笑容，但難免會令大家覺得我好似好怕醜，因為我唔擅長同人熱烈攀談，但其實內心有滿腔謝意。」
至於嚟緊嘅工作安排，啟豪表示佢將會第二次參與「黑暗中對話」慈善演唱會，為增添新意，啟豪仲邀請咗三位中聲好兄弟一齊參與，包括 劉威煌 顏志恒 同 梁浩賢 ，每場由啟豪同其中一位兄弟各自擔綱半場，當然唔少得合唱環節。
啟豪笑言，其實喺完全黑暗嘅環境唱歌，有一種與別不同嘅享受：「平時舞台上有好多視覺效果，觀眾亦會留意我嘅樣、表情、動作同台風，但喺漆黑之中，大家唔會分心，『被迫』專心聽我唱歌，我其實『暗啞底』幾鍾意㗎！加上我嘅好兄弟都有一把好聲音，相信無論兄弟或粉絲，都會分外享受呢種形式嘅音樂會。」
至於演出曲目與內容，啟豪為保神秘感，暫時唔想公布太多，佢透露箇中玄機：「今次除咗唱歌之外，仲會安排唔少有別於一般演唱會嘅互動環節，我覺得入場嘅觀眾應該會玩得好開心，亦會有一啲意想唔到嘅體驗。」
