陳家樂近年喺演藝事業成績越演越勇，曾於2003年參加過新秀歌唱大賽晉身最後16強，家樂入行後，主力朝演員方向發展，佢今年重拾音樂夢，正式宣布進軍樂壇，親自為新歌《我們都是無名氏》填詞，隆重舉行新歌發布會首唱新歌。
家樂曾多次謙稱自己「唔識唱歌」，甚至笑言做歌手會「影衰樂壇」，今次鼓起勇氣作出新嘗試，太太連詩雅（Shiga）唔只親自到場為老公打氣，佢仲自備應援物，戴上寫住老公英文名嘅應援頭箍，十足十小粉絲一樣。
家樂演唱新歌之外，仲唱咗Shiga嘅《只要和你在一起》，更向老婆招手邀請Shiga上台合唱。Shiga隨即小跑現身，上台一刻俾咗個「愛的抱抱」攬實家樂，呢一幕真係閃到戴黑超都擋唔住！網民都話家樂同Shiga嘅互動甜到令人想喊，隔住個Mon都覺得好幸福。
活動完結後，Shiga喺社交平台分享同老公合照，以及撰文表示感動，仲話自己都緊張咗幾日：「睇住你由為新歌填詞，到錄音，到真正推出自己首嗰個人作品，真係為你感到好興奮、好感動、好開心。尤其係知道你呢一首歌係好有意義，好有故事。」作為主角嘅家樂心情更加激動，表示自己「我居然做左呢件事😭😭😭，諗都冇諗過會搞一個mini show」，亦好感激各位嚟捧場嘅人。
