「音樂情人」鄭子誠同老婆劉倩怡結婚多年，夫妻感情恩愛如初，亦對狗狗好疼錫，一直都係圈中嘅模範夫妻。
喺9月23號，子誠就喺社交平台分享同老婆慶祝結婚23周年嘅合照，更以「 愛…沒一輩子的浪漫…只有一輩子的溫暖，情…沒一輩子的纏綿…只有一輩子的陪伴，未來日子…我會繼續固執地牽著你手….」作為配文，向太太表達心意。而喺子誠分享嘅合照中，除咗有佢哋嘅慶祝合照，仲有就有二人當年嘅結婚相，對比起嚟 呢廿幾年兩位變化亦不大！
倩怡同樣喺社交平台出Post放閃，曬出老公送嘅心意卡同禮物，仲話：「感謝你對我一輩子的愛….🙏唯獨你是不可取替💜💚❤️23結婚周年快樂」真係好閃！
子誠呢篇愛的宣言吸引唔少網民留言，有人表示感動，「情人忠奸都得，把聲又好得，抵你有賢妻。Happy together 要幸福啊」。有人趣怪留言重提子誠曾經喺《封神榜》飾演紂王，問劉倩怡：「當年同紂王拍拖有咩感想？」有偶遇過子誠夫妻嘅網民話：「Happy anniversary！星期日在教會外見到鄭先生夫婦，安靜的同行，祝福繼續恩愛。」
