陳俞霏聯同曹越劉曉昆推新歌 自揭曾墮騙局被不法之徒呃20萬

中聲唱將陳俞霏（霏霏）、曹越與劉曉昆日前推出首支合唱單曲，霏霏包辦作曲、填詞、編曲及監製，越越亦有參與作詞，以愛情詐騙為主題，佢哋為咗帶畀歌迷最佳嘅舞台視聽享受，三人落力排舞，展現超強默契。

霏霏覺得排舞最大難度係拍檔身高太高，自己企埋去有啲唔襯，曹越話拍檔之間身高差，能夠令霏霏更突出，昆昆讚霏霏企中間係最好睇。

霏霏雖然平時睇落好醒目，但佢試過墮入電話詐騙，不法之徒假冒執法人員，話佢差啲搞到人哋死，要凍結佢銀行戶口，霏霏好似扯線公仔咁跟隨佢哋操縱，最終蒙受廿萬巨額損失。