李冰冰現身西安出席一個品牌活動，冰冰嘅打扮集休閒成熟於一身，充滿優雅感覺。冰冰亦喺活動上分享人生態度，形容人生係不停喺一條路上行，所以要珍惜當下，每個時刻都係命運安排好要去教你一啲嘢，無論係痛苦定係驚喜，都係教大家一啲感覺。所以佢認為，最好嘅狀態係可以接受唔同處境下嘅自己。
冰冰喺多年演藝生涯中飾演過唔同類型嘅角色，而家佢接戲就更著重劇本質量。冰冰笑言，早前自己接受一個訪問，表達過如果劇本質量好，就可以唔收錢拍戲，所以而家收到好多劇本。自己好開心可以睇到好多風格唔一樣嘅劇本，仲話自己呢幾年經歷咗一啲事，呢段時間教咗自己更多難以言喻嘅智慧，希望可以喺選擇一個新作品時，係自己願意同大家分享嘅一種狀態。
