古天樂、此沙、任達華、袁富華、盧慧敏、謝君豪領銜主演懸疑警匪動作電影《偵戰》於10月上映，仲有張兆輝友情演出，集結多位實力演員同場交鋒。
預告片當中任達華一句對白「人命總會有個價」，與古天樂呢句「免費嘅嘢係最貴」對白，已暗示命案背後藏住一場交易。古仔曾透露片中除咗推理查案外，仲有大量動作場面，喺雷雨環境下經歷多場高強度拍攝。
古仔飾演探員「計子默」原本負責調查一宗「雙密室命案」，但致命彈頭經鑑定後，竟然指向計子默嘅配槍，一夜之間由「追凶者」淪為「最大嫌疑人」，佢必須喺時間耗盡前一邊自證清白、一邊追查真正密室謎團。
此沙飾演計子默忠實拍檔陽作，同時行動詭秘、身負重任，站喺信任與隱瞞之間，兩人配合成為對彼此信任嘅考驗。任達華飾演總局大探長「司寇宮」強勢介入，下令檢驗眾人配槍，掌握警局內部權力；謝君豪飾演情報局專員「畢書堂」慧眼識人、心思細密，身份卻帶着難以看清嘅一面。
張兆輝、袁富華、楊偉倫亦悉數入局，眾人身份與立場難辨，共同織就一張「全員有嫌疑」人物關係網，燒腦佈局盤根錯節，最終能否撕破層層迷局，為受害人討回公道呢？
