葉麗儀陳潔靈靚聲金曲獻唱 容祖兒現身答謝指導之恩

葉麗儀 同 陳潔靈 舉行一連五場演唱會，為咗令觀眾有最佳嘅視聽感覺，佢哋花盡心思喺音樂方面，難怪Miss Chan Chan話中途走咗落台聽Frances唱歌，更期望能成為觀眾睇足全場。

Frances話唱得好享受，因為現場音質好靚，兩人笑指做完今次高質素演唱會，返唔到轉頭。

五晚演出有唔同嘉賓上台，第二晚就有 容祖兒 驚喜現身，同Miss Chan Chan合唱《未知》，Joey話今次嚟做嘉賓係報恩，因為當年自己推出《未知》之前，先後多次去Miss Chan Chan屋企學習點唱，令佢有一首好好嘅歌曲作事業開始。佢又特別同兩位前輩合唱師傅羅文嘅歌曲，以表對師傅致敬。

Frances話老公今次冇嚟香港，但係每日要向老公報平安，因為自己六月時喺英國突然腳痛到落唔到床，經檢查後發現係坐骨神經痛，而家一直接受治療，完成演唱會後，將要返澳洲做一個小手術，再休息半年時間。