由內地同香港合拍嘅犯罪題材三級片《空槍》呢日喺香港舉行戲院見面會，幾位主演朱一龍、衛詩雅、李施嬅、袁富華、唐文龍、張松枝，聯同導演韓延等齊齊出席，幾位演員仲向在場影迷派菠蘿包賀中秋，氣氛溫馨又熱鬧。
朱一龍今次喺戲中唔止要講廣東話對白，仲要唱廣東歌氹Michelle，可惜最後相關內容被導演剪走晒，呢日朱一龍喺見面會就應在場觀眾要求，即場對住Michelle清唱《分分鐘需要你》，原來Michelle老公都喺現場，搞到朱一龍好尷尬。
而Michelle對朱一龍嘅評價好高，逢人就讚佢又靚仔又好戲，搞到老公有啲呷醋，仲主動追問Michelle同朱一龍有冇親熱戲，認真搞笑。
李施嬅今次就同另一位內地人氣男星檀健次有好多對手戲，講到印象最深刻嘅場口，施嬅就話係正式開拍前，大家素顏相見嘅一刻，施嬅話自己因為眼睛做過手術，所以冇信心素顏，但喺導演鼓勵下衝破心理關口，佢仲搞笑自封係「素顏三級女星」。
