溫碧霞 日前出席於西安舉行嘅「第十三屆絲綢之路國際電影節」，以頒獎嘉賓身份參與「金絲路獎」頒獎禮，一直積極參與華語電影文化交流嘅Irene，見到咁多優秀嘅電影同演員，感到十分興奮。
講到近年電影科技迅速變化，尤其係AI喺影視創作上嘅突破，Irene坦言自己一直密切留意相關發展。佢指近月已有多間片商同內地電視台向佢發出邀請，希望佢參與AI電影同AI電視劇嘅拍攝，Irene透露現階段仔細了解唔同項目嘅方向同製作模式，強調會喺合適時機選擇最佳作品。
問到會否擔心AI取代電影業？Irene直言唔使擔心，認為AI無法完全取代人類嘅創作力，反而可以幫創作者帶來更多靈感同可能性，佢希望未來能參夠同更多融合科技與情感嘅作品，為觀眾帶來耳目一新嘅感覺。
