陳家樂 近年不時透露想出歌嘅心願，而呢個心願終於成事，喺太太 連詩雅 同一眾好友見証下舉行新歌《我們都是無名氏》發佈會。家樂除咗獻唱新歌，又自彈自唱哥哥張國榮金曲，台下嘅陳太Shiga變成頭號fans，當老公示意邀請佢上台時，佢即刻衝上台同老公一齊合唱，場面溫馨。
家樂感激大家嘅支持同包容佢將私心歌曲放喺發佈會獻唱，又希望大家可以喺電影以外嘅世界，喺音樂或者佢所填嘅歌詞入面認識到佢係咩人，佢亦期待自己可以成為別人嘅無名氏去畀鼓勵人。家樂直認發佈會前心情緊張，即使太太點叫佢放鬆都聽唔入耳。
對於首次演出，佢畀自己50分，又特別多謝好兄弟 洪卓立 日前專登去佢綵排地方，教佢點樣用聲同發聲，令佢一改以往唱歌習慣。佢話上台一刻有種「死就死喇」感覺，就好似演員聽到「action」，跟住只會專心演好場戲嘅感覺。
