90年代憑一曲《我失戀你悲傷》紅極一時的前寶麗金歌手洪楗華（前藝名洪健華），傳出日前於病逝噩耗，終年49歲。消息指佢已與病魔抗爭長達10年，同佢相識逾30年嘅好友范振鋒證實死訊，語帶傷感指聞訊後不禁落淚，圈中好友與樂迷紛紛表達深切惋惜。
洪楗華年僅17歲時參加寶麗金歌唱比賽，憑著清秀外貌被譽為「翻版金城武」。隨後獲得已故「歌壇教父」戴思聰賞識收為徒弟，並順利簽約寶麗金唱片。
1994年，洪楗華推出首張個人專輯《青春像個謎》，當中代表作《我失戀，你悲傷》流行一時，傳唱度極高，令佢一躍成為備受矚目新星。其後佢轉投上華唱片，1998年推出《幻覺》EP，至合約完結後決定逐漸淡出樂壇，回歸平淡生活。
淡出幕前之後洪楗華轉行營商，據指娶青梅竹馬女朋友為妻，婚後育有一對子女，組成四口之家，享受平凡而溫馨嘅家庭生活。
雖然遠離幕前，不過洪楗華對唱歌依然熱情未減。2020年間曾獲邀現身《流行經典50年》重唱經典代表作《我失戀，你悲傷》，當時佢透露為以最佳狀態示人，特意於3個月內成功減肥30磅，獲大批歌讚賞寶刀未老。
其後佢亦偶爾與黃翊、劉彩玉等昔日好友於網上開Live Jam歌。可惜佢多年前已確診患癌，抗癌10年期間一直保持積極態度，如今不敵病魔離世，昔日深情歌聲不再。
