前立法會議員兼律師謝偉俊（Paul）與著名電台主持人「白姐姐」白韻琹，一直係圈中著名「姊弟戀」代表。近年鮮少公開露面嘅白姐姐，早前傳出患腦退化症同身體欠佳，引來外界關注。不過謝偉俊就於中秋節分享了一段兩人拍攝嘅溫馨影片，片中白姐姐精神不俗、氣色紅潤，更主動獻吻放閃，同阿Paul甜蜜互動。
謝偉俊公開嘅短片中，展示兩人以多個造型拍攝嘅花絮。可見阿Paul細心為白姐姐整理衣衫同披肩，眼神充滿溫柔愛惜。白姐姐就染上一頭亮金頭髮，搭配唔同帽同華麗大衣，造型更被網民大讚「後生十年」。
白姐姐亦於鏡頭前展露招牌燦爛笑容，又深情地親吻阿Paul面頰，兩人手牽手、緊緊相擁，眼神交流充滿默契，打破外界對白姐姐身體狀況嘅種種揣測。
回顧呢段年齡相差15歲；橫跨近40年嘅「姊弟戀」，兩人早於1989年因合作主持電台節目而結緣並相戀同居，1997年喺拉斯維加斯正式註冊結婚。呢對組合當年一度不被外界看好，但多年來始終並肩，唔止事業上互相扶持，更曾拍攝話題度十足嘅寫真。
近年白姐姐因年歲漸長深居簡出，阿Paul就一直陪伴在側細心照顧。早前被問到會否擔心忘記丈夫時，白姐姐曾果斷回應「唔會！」。如今中秋佳節再現甜蜜放閃影片，唔少網民亦留言祝福兩人健康長壽、繼續恩愛。