許冠文（Michael）於電影《破。地獄》中飾演看透生死嘅喃嘸師傅，現實中嘅Michael亦豁達面對生死話題，佢於香港電台、中國香港移植運動協會（HKTSA）及香港移植學會合作嘅節目《移植新突破》中，罕有談及器官捐贈、生死觀及自己嘅身後安排，更坦言早已與太太及子女講過自己嘅意願。
唔少傳統嘅華人，都希望「保留全屍」而抗拒器官捐贈，不過Michael就對呢件事有另一個睇法，佢喺節目中表示：「譬如捐贈你嘅器官，你可以嘅話就捐畀人哋，自己都冇用嗰時，你都自己要霸住，仲要全屍。有咩需要全屍呢？」
而另一位嘉賓鄺美雲（Cally），亦喺節目中憶述自己10歲開始照顧患上血癌及乳癌母親嘅經歷，佢分享有次媽媽突然嘔吐，雖然被媽媽搞到成身都係，但佢都先安慰好對方，幫媽媽清理乾淨後先處理自己。Cally直言呢段童年經歷，令佢深深明白到照顧病人，除咗係生活上嘅照料外，家人嘅態度與陪伴都同樣重要。
今年獲委任為「器官捐贈宣傳大使」嘅 王鄭浚仁（Rax），曾因患病而無法正常說話及唱歌，今次參與《移植新突破》中「面孔移植」一集，坦言大開眼界，Rax更表示希望藉宣傳大使身份，令更多人認識及關注器官捐贈。
節目共13集，透過醫療專家、不同界別嘉賓及生命故事，帶領公眾重新認識移植醫學的發展，並推廣器官捐贈訊息。節目邀請到 許冠文、鄺美雲、前醫院管理局主席胡定旭、胡兆康、張可堅、劉倩婷、李丞責、黃錦山、釋常霖法師、李金凱，以及「器官捐贈推廣大使」王鄭浚仁等嘉賓，至於星級主持則包括車淑梅、廖安麗、方健儀、關心妍、鄧慧詩及馮加信醫生。
