顏米羔 入行後推出第三首單曲《子虛鳥有》，近日佢接受《StartTalk》訪問，同主播 許文軒 道出呢首歌嘅由來。
《子虛鳥有》嘅作曲人係曾經編寫名曲《為你鍾情》嘅作曲家 王正宇 ，米羔知道後受寵若驚，憶起當日喺演唱會上結織王太後，到自己開騷前得知王正宇為佢寫咗首新歌，於是就狂聽，搵到一個方法去演繹，以為自己嘅方式會成功，點知被指哭腔太重，再經多次改良同調節得出現時效果，亦係難得見到米羔嘅輕柔一面。
新歌MV由米羔自編自導主理，佢笑言可以慳錢，但過程就令佢好攰，加上拍攝時男主同導演嘅角色轉換，搞到佢表情管理增添難度，經常要提醒自己放鬆肌肉，唔好愁眉深鎖。
由幕後走到幕前，米羔坦言曾經承受好大壓力，幸好身邊都有同路人支持，而佢眼見嘅例子鄧麗欣亦曾經負面新聞不斷，但佢就處之泰然，最初仲以為佢扮無事，但原來佢抗壓力好高，同Stephy合作相處時覺得佢係個鄰家女孩好好人，所以心裡都好多問號。
米羔又憶起入行前做攝影師時，有次一個婚宴上同新人及台下賓客都相識，竟然踏上小舞台上唱歌被柴台掟筷子，當時都好唔開心，自問唱歌係咪咁差？但當刻米羔並沒有停下，反而繼續唱，警醒自己要更努力創出成就。
講到同媽媽嘅關係米羔更不禁感觸落淚，米羔一向都最著重媽媽感受，形容自己由細到大都「不知所謂」，而參加《中年好聲音》獲獎就成為最大成就，可以俾媽咪睇到佢喺電視機上攞一次獎，深刻記得落台後佢不顧一切就衝向媽咪身邊分享喜悅。米羔並多謝米粉同行，希望唔會令每一位為佢吶喊過嘅人失望，又應承會多啲見媽咪飲湯。