陳自瑤 早前迎接45歲生日，而出名係佢圈中閨蜜嘅 黃翠如 同 連詩雅 亦再次合體，為好姊妹溫馨慶祝。Shiga於社交平台曬出合照，好姊姊一樣笑容燦爛、溫馨滿瀉，展現出真摯友誼。
Shiga又寫道：聽人講過，如果一段友誼可以走過七年，大概就係一世🤭翻一翻月曆，呀～原來由 2019 到而家，已經陪你過第八個生日!
時間真係過得好快，呢幾年大家的生活同角色都有唔同轉變，見證住彼此一步步成長。
雖然平時大家各自為生活奔波、為返工忙碌，但每一次坐低見面，永遠都有傾唔完嘅話題，每一次都傾到人哋閂門都唔想走🤣🤣
好似你咁人美心善嘅女仔，值得世間所有最好嘅人同美好嘅事物。雖然今年遲咗少少慶祝，但祝福依然最真，遲來的生日快樂！
願你繼續自由自在做自己鍾意嘅事，永遠眼裡有光，心想事成
其實呢段深厚姊妹情，緣起自2020年劇集《那些我愛過的人》，當時佢哋於劇中飾演情同手足嘅好姊妹，因合作愉快而發展友誼，戲裡嘅深厚感情由螢幕延伸至現實生活。自此彼此嘅生日、或大節日，佢哋都會相約聚會見面陪伴。
Yoyo近年事業發展理想，不過就經常身處外地，兼顧演藝事業同家庭。而Shiga亦同陳家樂婚後升格為人母，同步發展事業同幸福家庭新篇章。而翠如同蕭正楠婚後亦甜蜜依舊，加上蕭哈哈令人生更豐盛。
縱然佢哋已為人妻、甚至成為人母，但三人感情依舊親密，互相分享生活同育兒點滴，繼續將姊妹情深厚發展。