雙胞胎兄弟 周志文 同 周志康 星期一生日踏入37歲，兩兄弟特別於社交平台發文慶祝，更公開年幼時於公園坐飛機搖搖凳嘅溫馨合照。雖然感嘆歲月飛逝，不過佢哋亦分享自幼已形影不離，由玩樂、游水到打波嘅喜好完全一致，直到17年前，2009年一齊參加《超級巨聲》踏入演藝圈，多年來一直並肩作戰、互相支持。
雖然入行後兄弟於演藝路上經歷唔少起伏，感情與事業亦各有發展，細孖阿康早已成家立室兼為人父，早前以蒙面藝人「企鵝人」身份出戰《中年好聲音4》獲第8名，隨後亦加入參演處境劇《愛．回家之三代同糖》，飾演「何媽」一角大受觀眾歡迎，聽日(9月30日)更會同一眾動物歌手一齊開騷演出。
至於大孖周志文離巢後就積極多方面發展，又與港姐出身嘅 劉佩玥傳出緋聞多年，雖然兩人對感情一直低調處理，不過就先後多次被發現甜蜜約會，感情相當穩定，早已係外界公認一對。
而藉37歲生日，兩兄弟更喺社交平台正式宣布驚喜好消息，佢哋11號就會舉辦記者會宣佈《兄弟．無雙演唱會》詳情。阿康仲寫道話，《中年好聲音4》得到好成績重新喚醒佢哋對唱歌最純粹嘅熱情，所以決定兄弟合體再踏舞台。呢場演唱會係佢哋送俾陪伴多年好朋友嘅禮物，希望同大家一齊分享喜悅。
