郭富城日前公布將喺啟德體育園主場館舉行跨年演唱會，城城近日忙於完成巡唱深圳站，佢全心投入工作之餘，仲好愛錫妻女，安排方媛（Moka）同兩位寶貝女於6月26號到場捧場，喺每場演唱會嘅全場互動「Battle」環節，城城即興點名大女郭詠希（Chantelle）、次女郭詠萱（Charlotte）演出，為現場觀眾帶嚟驚喜，而愛妻方媛今日喺社交平台亦曬出細女郭詠心（Cheryl）嘅跳舞片：「3寶也來挑戰鯊魚舞了👋👋👋」
城城一向對愛女非常保護，兩位千金出席公眾場合常戴太陽眼鏡遮樣，呢次佢睇爸爸開騷，二人着爸爸演唱會嘅周邊衣服，罕有曬靚樣，城城愛女五官精緻，爸爸喺台上挑選幸運兒跳改編版「鯊魚舞」時，點名兩位女兒曬舞技，螢幕鏡頭即鎖定觀眾席，影住方媛同兩名愛女隨即音樂響起。
城城兩位寶貝女跟隨節奏起舞，流暢舒展、節奏精準，對舞步非常熟練，二人做出城城招牌抬腿動作作結，全場報以掌聲，大女主動向觀眾鞠躬致謝。
城城眼見寶貝女表現出色，佢亦感到好驕傲，向愛女豎起拇指，更一臉自豪稱係愛女自學，唔少網民讚舞王兩個女兒好會跳、好厲害，好有爸爸嘅風範。
此外，方媛今日喺社交平台罕有曬細女側面嘅影片，見細女一頭濃密烏黑嘅短髮、戴上精緻髮夾，正在開心地跳舞，細女白皙皮膚，臉頰圓嘟嘟，擁有濃密睫毛，非常可愛。
