張振朗 同 劉佩玥 日前飛往新加坡同馬來西亞，出席一連四場中秋節活動，與當地粉絲歡聚中秋佳節。兩人所到之處均獲熱情支持，氣氛熱烈。
Owen同阿Moon首站到新加坡United Square出席見面會，現場又安排趣味問答、有獎遊戲同當地粉絲近距離互動，分享中秋節點滴。活動當晚佢哋更即席獻唱，Owen送上《歲月如歌》同《我的宣言》，而於《中年好聲音 4》中展現歌唱實力嘅阿Moon就獻唱《小幸運》同《Try Everything》，令現場粉絲聽得如癡如醉。
之後兩人就轉往馬來西亞，繼續行程，佢哋先到金河廣場與大馬粉絲共度中秋。雖然活動當日遇上大雨，依然無阻粉絲熱情，當天 彭詡越 蕭偉倫 加上主持 陳奕伸 亦同場現身，彭詡越率先登台獻唱《讓我高飛》，隨後蕭偉倫就為觀眾帶來《護航》，佢又同時預告將12月會推出新歌。 
Owen同阿Moon其後上台，同大家積極互動，原來今次係Owen首次於大馬過中秋，佢仲笑言早已聽聞大馬榴槤月餅相當出名，不過佢就坦言自己最愛傳統「雙黃蓮蓉」月餅喇。而阿Moon就指自己咩月餅都一樣鍾意，不過食完就一定要靠運動「還債」管理身材。
阿Moon又提到新劇《模範律師團》點滴，Owen亦分享《模仿人生》嘅演出，最後同觀眾互動玩遊戲同合照留念。
Owen同阿Moon亦參與《秋聚文化音樂節》，3位《中年好聲音4》唱將亦同場演出，鄭仲豪率先登場獻唱《離開地球表面》，尤淑情就為觀眾獻唱快歌《三天三夜》，最後則由《中年好聲音4》亞軍 許雲妮 以決賽當晚歌曲《I Will Survive》獻唱。
同為中聲唱將嘅 阿Moon亦再大展歌喉，之後由Owen壓軸出場演唱《愛的就是你》同《歲月如歌》。行程最後一站，兩人轉往Hextar World Empire City出席見面會。兩人於醒獅同粉絲陪同下，一同於現場提燈籠遊覽，現場洋溢濃厚佳節氣氛，歡呼聲此起彼落，為一連串中秋活動畫上熱鬧又溫馨的句號。
