為紀念哥哥 張國榮 嘅70歲冥壽，將推出哥哥喺廿多年前錄製，但一直未正式發行嘅國語遺作《愛情小孩》。呢首歌由當年與哥哥合作無間嘅音樂監製 梁榮駿（Alvin）親自操刀重製，並以最高規格製作，讓哥哥珍貴動人嘅原聲再次重現人前。
呢首《愛情小孩》係哥哥經典作品《春夏秋冬》嘅國語版本，監製梁榮駿透露當年未有推出嘅原因，係覺得原版嘅編曲未達理想標準，直到近年以全新角度審視，再次被哥哥嘅歌聲打動，所以決定趁哥哥70冥壽呢個特殊時刻，讓呢首作品問世。
製作團隊遠赴歐洲及澳洲，邀請捷克布拉格管弦樂團，以全真樂器伴奏、意大利大師級音樂人負責編曲，並於澳洲完成混音。Alvin表示：「製作過程充滿心思，透過管弦樂團伴隨哥哥歌聲的情感起伏同步演奏，彷彿 Leslie 站在現場舞台上，與整個樂團即時呼應。」
呢次特別收錄咗兩個版本，除咗哥哥原唱嘅《愛情小孩》外，亦收錄由香港大師級鋼琴家 Ted Lo 演繹嘅純鋼琴演奏版《春夏秋冬 Rhythm of Life》。而喺視覺呈現上，封面則採用哥哥生前親自挑選，並認可嘅經典菲林照片，展現出佢獨有嘅華麗與神秘氣質；海報及裝幀設計則由曾為哥哥設計唱片，並屢獲殊榮嘅御用設計師 Kenneth To 操刀。
Alvin表示與哥哥結緣於專輯《Virgin Snow》，其後獲邀監製《側面》大碟，從此展開長遠嘅合作關係，亦成為佢音樂生涯嘅重要轉捩點，Alvin希望透過今次全新製作，讓廣大樂迷喺哥哥70冥壽之際，再次感受到佢永恆不滅嘅藝術生命力。
